Ang pagbubunyag na ginawa ni Jun Lozada sa maanomalyang ZTE National Broadband Deal ay lalo lamang nagpasabog sa malawakang pandarambong na umiiral sa korap na pamahalaan na pinamumunuan ng pangkating Gloria Macapagal Arroyo at sindikatong pamilya nito. Bagama’t patuloy na sinusubaybayan ng sambayanan ang imbestigasyon na isinasagawa sa Senado, nagkukumahog naman ang Malacañang na pagtakpan ito sa pamamagitan ng pagpigil sa ilan sa mga opisyal ng gobyerno, tulad ni dating NEDA Secretary Romulo Neri, upang harapin ang nasabing imbestigasyon at pagtangkang maglabas ng mga bogus na testigo upang lituhin ang mga mamamayan sa mga naging tunay na kaganapan sa maanomalyang transaksyon na ito. Sa paglipas na ng napakaraming rehimen sa ating pamahalaan, laganap na ang ganitong klase ng pandarambong sa kabang-yaman ng ating bansa subalit ang kasalukuyang paghahari ni Gloria Arroyo at ng kanyang sindikatong pamilya ang siyang may pinakamaraming katiwaliang naitala sa buong kasaysayan, kabilang na ang Northrail-Southrail Projects, Cyber- Education, Fertilizer Scam na para sa magsasaka ngunit ginamit sa kampanyang elektoral, Macapagal Boulevard na pinakamahal na daanan sa buong mundo, ZTE deal na may 130 milyong dolyar na kickback. Bukod pa ang usapin sa garapalang dayaan noong electoral 2004 na “Hello Garci Scandal, Jose Pidal Account” at napakarami pang ibang kasalanan sa mamamayan tulad ng extra-judicial killings na umaabot na sa 891 pinaslang.

Sa kabila nito, patuloy naman ang pagtindi ng kahirapan at paghihikahos na ating nararanasan. Lalong nagiging malinaw sa atin na ang kahirapan na ito ay resulta ng korapsyon sa pamahalaan at kontra mamamayang mga patakaran ng rehimen. Kahit sa hanay ng mga konserbatibong mga ekonomista, walang naniniwala sa gawa-gawang estadistika at pahayag ng rehimen na nagpapakitang “umuunlad” ang bansa, bagkus ay lalo lamang nagpatuloy at tumindi ang pagtaas ng presyo ng mga pangunahing bilihin at langis.

Ang korapsyon ay napakalaking usapin, imbes na ito ay napapakinabangan nating mamamayan para sa pabahay, hospitalisasyon at edukasyon ay nauuwi sa bulsa ng ilang tao at pamilya. Ilang daang libo sanang bahay ang magagawa para sa mga walang sariling bahay, ilang daang libong silid- aralan at libro sana ito para sa mga nagsisiksikang mga estudyante at ilang milyong may sakit sana ang magagamot at ilang programa sana ito para sa pambansang industriyalisasyon at agraryo. Hindi tayo ligtas dito at kinakailangan makialam dahil tayong lahat ang magbabayad ng trilyong pagkakautang natin sa pamamagitan ng 12% E-VAT na nakapatong sa bawat bilihin at sahod ng mga manggagawa.

Kaya sa mga ganitong usapin kinakailangang magbuo ang mga mamamayan lalo na ang mga maralita ng isang alyansa at samahan upang maisatinig at magkaroon ng boses ang mga usaping ito. Ang ating layon ay lumabas ang katotohanan at panagutin ang mga may mga sala. Kahit pa pinipilit ni Gloria Arroyo na lusutan at ipagkait sa atin ang katotohanan at hustisya, sa huli ay tayo pa rin ang mapagpasya. Sa ngayon ay nagbubuo na ng malalaking alyansa ang mga sektor sa lipunan tulad ng mga manggagawa, magsasaka, taong simbahan, kabataan at estudyante, mga negosyante, kababaihan, maralita, mga makabayang pulitiko at propesyunal maging ang mga retirado, aktibo at pamilya sa hanay ng militar.

Ngayon higit kailanman ay kinakailangan nating ipakita ang lakas ng ating pagkakaisa para sa katotohanan at katarungan. Ang mga naging karanasan at aral na natutunan noong EDSA 1 at EDSA 2 ang gagabay sa atin para itaguyod ang pamahalaan na mas demokratiko at tunay na naglilingkod sa mamamayan. Sa laban natin ngayon ay hindi na natin hahayaan na magpalit lang ng mukha ang nakaupo sa Malacañang kundi itatatag natin ang isang demokratikong konseho/komite ng mamamayan at habang itinatatag ito ay bubuuin muna pansamantala ang isang Triumvirate (Tatlong Pantay na Pamunuan) na ang mga mauupo ay mula sa tatlong sangay ng pamahalaan (Ehekutibo, Lehislatura at Hudikatura) na siyang tatayong Caretaker Government at siyang pansamantalang mamamahala sa mga usaping pambayan sa loob ng apat (4) na buwan at siya ring hahawan ng daan para sa paglulunsad ng isang tunay na mapayapa, malinis at makabuluhang halalan (Snap Election) para sa mga lehitimong mamumuno sa bayan. Habang wala pang namumunong tunay na halal ng bayan, higit na kailangan ang masiglang paglahok ng mga mamamayan sa mga pagkilos upang bantayan at tiyaking ang mga patakaran at programa ng Triumvirate ay naglilingkod para sa kapakanan ng mamamayan. Nararapat lamang na buuin ang mga Komite ng Mamamayan sa mga bayan upang siyang magsuri at matiyak na mabawasan kung hindi man mawala ng lubusan ang katiwalian sa pamahalaan. Sa pamamagitan lamang nito natin matitiyak at malalasap ang tamis ng ating tagumpay. Gagawin nating makasaysayan ito sa pamamagitan ng paglawak ng partisipasyon ng mamamayan para sa katotohanan at hustisya.

Nararapat lamang na lumabas na ngayon ang katotohanan hinggil sa mga katiwaliang laganap ng umiiral sa pamahalaan. Bigyan natin ng katarungan ang kahirapang dulot ng mga tiwali sa pamahalaan sa mamamayan. Nananawagan kami sa lahat ng mamamayan na aktibong lumahok sa mga pagtitipong ilulunsad upang ilantad ang katotohanan sa likod ng matinding pagkabusabos at kahirapang dinaranas ng mga mamamayan.

 

 

Welcome Remarks

ni Emilia P. Dapulang,

co-convenor ng WORKERS ACTION!

 Marso 12, 2008

 

Isang magandang hapon sa lahat ng kapwa ko manggagawa, mga naimbitahang tagapagsalita at sa lahat ng mga naghahanap sa katotohanan at nakikipaglaban para sa katarungan.

 

Sa ngalan ng mga convenors ng WORKERS ACTION! o Workers for Accountability, Truth and Arroyo's Resignation, nagpapasalamat kami sa inyong pagdalo kahit na napakaikli ng panahong naigugulol sa imbitasyon para sa makasaysayang pagtitipon ngayong araw.

 

Batid naming mga convenors sa sa nakaraang mga linggo ay nagkaroon ng mga pagpupulong ang mga manggagawa sa iba't ibang lugar at nagtayo ng mga alyansa o mga pormasyon bilang reaksyon sa mga nabunyag pang lalim at lawak ng korupsyon sa gubyerno at pang-aabuso sa kapangyarihan ni Pangulong Gloria Macapagal-Arroyo, Unang Pamilya at kanilang malalapit na kaibigan at alyado.

 

Napakabilis ng reaksyon nating mga manggagawa dahil hindi nakapagtatakang magngitngit tayo sa galit dahil sa panahong ipinagkakasya natin ang ating mga kakarampot na sahod relatibo sa tubong nakukuha ng mga kapitalista at sa matataas na presyo ng mga bilihin, nagpipiyesta pa ang iilan sa mga ninanakaw  na pera ng bayan at nabubuhay sila sa luho at kapritso na para bang wala nang bukas.

 

Nanginginig tayo sa pagkamuhi at protesta nang malaman natin ang sabwatan ng tinatawag na 'malalaking tao' sa ating lipunan upang muling lokohin tayo, ipagkamaling proteksyon ang pangingidnap, ipangalandakang tayo lang sa Kamaynilaan ang nakakabasa ng pandarambong at pagsisinungaling at ipalaganap na tayo'y pagod na upang manindigan at makipaglaban para sa kawastuhan, katotohanan, kaayusan, kapayapaan at katarungan.

 

Ang pagbubuo natin ng WORKERS UNITY! ay pagsusumikap natin na magkaroon ng ekspresyon ang kolektibong protesta at galit natin, ang paninindigan para sa tama at totoo at upang ipaalam sa lahat na tayong mga manggagawa ay nagpupunyagi upang ibayong magkaisa sa napakahirap na sitwasyon natin sa ngayon.   

 

Nandito tayo ngayon para sa ACCOUNTABILITY ng gubyernong Arroyo na harapin ang mga kasalanan at krimen nito sa mga manggagawa at mamamayan.

 

Nandito tayo ngayon para sa TRUTH o KATOTOHANAN  na ating nakikilala at ipinaglababan habang walang habas naman itong binabastos at binabaluktot upang magsilbi sa makikitid na interes ng iilan.

 

Nandito tayo ngayon upang igiit ang RESIGNATION o PAGBIBITIW sa pwesto ni Gloria Macapagal-Arroyo bilang pangulo dahil wala na siyang moral na awtoridad para mamuno at wala nang pagkilala at pagsuporta nating mga manggagawa.

 

Muli, maraming salamat sa pagdalo.

 

==============================